Plantun de Prouvènço

Pèr coumpara dos planto d'encò nostre

Leontodon tuberosus & Typha laxmannii

Moulin-de-prat(-bóujoula)

Leontodon tuberosus

Asteraceae Compositae

Autre noum : Mounge.

Nom en français : Liondent tubéreux.

Descripcioun :
Aquéu moulin-de-prat trachis dins li tepiero sablouso e argilouso. Flouris de la fin de l'estiéu au printèms segound li plueio, e pièi passo lou gros de la calourasso bonodi sa racino bóujoulado, o tuberisado s'amas miés. Lis akène dóu bord de la flour coumpausado an eici ges d'eigreto e rèston de tèms après la cabusso dis akène dóu mitan.

Usanço :
Li racino soun manjado crus (Grèço, Espagno, Sicilo) e li fueio peréu en ensalado o cuecho à la vapour (F. Couplan, op.cit. p. 424).

Port : Erbo
Taio : 5 à 40 cm
Fueio : basalo
Tipe bioulougico : Geoufite
Cicle bioulougico : Planto renadivo

Gènre : Leontodon
Famiho : Asteraceae
Famiho classico : Compositae
Tribu : Cichorieae

Coulour de la flour : Jauno
Petalo : >6
Ø (o loungour) enflourejado : 2 à 3 cm
Flourido : Printèms Autouno - Ivèr

Sòu : Ca
Autour basso e auto : 0 à 800 m
Aparado : Noun
Setèmbre à abriéu

Liò : Tepiero sablouso - Tepiero argielouso - Ermas - Orle
Estànci : Termoumediterran à Mesoumediterran
Couroulougi : Estenoumediterranenco
Ref. sc. : Leontodon tuberosus L., 1759

Fielouso(-de-Laxmann)

Typha laxmannii

Typhaceae

Àutri noum : Filouso, Sagno, Masseto.

Nom en français : Massette de Laxmann.

Descripcioun :
Aquesto fielouso o sagno trachis dins li roubino e en ribo d'aigo. La planto es eici pas tant verdalo que si cousino. Pèr la destria mai seguramen fau regarda li fueio que fan de 2 à 5 mm de larg, aleva aquéli di rejit que podon faire fin qu'à 8 mm. Causo impourtanto, lis auriheto di fueio d'en aut soun bèn marcado emé souvènt de pichòti pouncho (vèire la fotò).

Usanço :
Li fueio de fielouso podon èstre utilisado rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.